Las purschidas en ils parcs

In territori selvadi davant las portas da Turitg, perscrutaziun d’ina colonia da furmiclas en il Giura vadais, gitas da giudiment en il Project Parc naziunal dal Locarnese u lieus istorics e preistorics en las muntognas grischunas: Ils parcs svizzers porschan experientschas fascinantas en cuntradas natiralas intactas e cultivadas en moda caracteristica ed intermedieschan uschia savida en maniera attractiva.

Independentamain sch’ins è en viadi cun ina classa da scola, cun la famiglia u be sulet, en ils parcs svizzers chattan tuttas e tuts purschidas attractivas:

  • turas en cuntradas alpinas,
  • excursiuns tras collinas e planiras,
  • trekkings en grippa e chavorgias u 
  • spassegiadas tras curtins da pumera en flur.

Er per quels che s’interessan per la cultura e la natira datti in program attractiv: ins po

  • pedalar cul velo sin vias da transit istoricas,
  • emprender d’enconuscher las istorgias fascinantas da fortezzas e chastels, u 
  • scuvrir palids sin trutgs infurmativs.

Ultra da quai datti dapertut ina gronda varietad d’aventuras culinaricas:

  • signuns e pasturs preschentan la cuschina alpina,
  • viticulturs avran lur tschalers da vin,
  • sendas da degustaziun mainan tar producents da products regiunals sco chaschiel, liongias, vin e paun.

Purschidas spezialas

Per famiglias, classas da scola, gruppas e firmas offran ils parcs purschidas pauschalas spezialas:

  • excursiuns e turas guidadas,
  • sendas tematicas,
  • referats u
  • emnas d’instrucziun.

La paletta da pussaivladads per prestar servetschs voluntaris e da curs e scolaziuns per creschids è enorm vasta.

Ir cun la scola en in parc

Ina da las incumbensas principalas dals parcs èn las purschidas per sensibilisar e scolar la populaziun locala ed er las visitadras ed ils visitaders. Il parc natiral da recreaziun Sihlwald (ZH) offrescha per exempel excursiuns preparadas per mintga stgalim da la scola primara. Divers parcs porschan «Excursiuns linguisticas Lingua Natura»: Binntal (tudestg dals Gualsers), Chasseral (franzos), Val Müstair (vallader), Veglia Devero IT (talian) e Val Grande IT (talian). Questas excursiuns linguisticas cumbineschan l’instrucziun da lingua cun bleras activitads e spassegiadas. En il Entlebuch datti in’atgna academia da biosfera che porscha perfin curs da jodlar, d’entagliar e da far la lutga.