Las differentas categorias da parcs

I dat trais categorias da parcs d’impurtanza naziunala: parcs naziunals, parcs natirals regiunals e parcs natirals da recreaziun. Quests trais tips han mintgamai caracteristicas e finamiras differentas.

Ils parcs naziunals

In parc naziunal cumpiglia adina ina zona centrala ed ina zona periferica. En la zona centrala sa sviluppa la natira libramain en in ambient intact ed inaccessibel. Las activitads umanas èn fitg limitadas. La zona periferica d’in parc naziunal cumpiglia tschertas vischnancas cun lur cuntradas cultivadas natiralmain e cun lur territori che vegn sfruttà turisticamain e forestalmain. Questas zonas perifericas protegian la zona centrala d’influenzas negativas. Il Parc Naziunal Svizzer ch’exista dapi 100 onns suttastat ad in’atgna lescha federala. Il territori ch’el cumpiglia è in dals territoris selvadis da las Alps protegids il meglier.

Ils parcs natirals regiunals

In parc natiral regiunal è ina regiun rurala cun ritgezzas particularas sco ina cuntrada diversifitgada, ina gronda biodiversitad e patrimonis culturals valurus sco la Viafier retica en il Parc Ela. Questas ritgezzas duain vegnir mantegnidas e promovidas, ma er valurisadas per in svilup duraivel da la regiun.

Ils parcs natirals da recreaziun

In parc natiral da recreaziun posseda mintgamai ina zona centrala ed ina zona da transiziun. En la zona centrala porscha el a la flora e fauna indigena in ambient intact. La zona da transiziun protegia la zona centrala. Ella porscha bleras pussaivladads d’infurmaziun, d’activitad e da recreaziun e contribuescha uschia substanzialmain ad ina meglra qualitad da vita per la populaziun da las citads. In parc natiral da recreaziun sa chatta adina a maximalmain 20 kilometers dal center d’ina aglomeraziun e sto esser bain cuntanschibel culs transports publics.