Il label per parcs e products

L’Uffizi federal d’ambient (UFAM) certifitgescha cun il label federal per 10 onns ils parcs ch’adempleschan las pretensiuns da la Confederaziun. Products e servetschs da quests parcs pon vegnir certifitgads da la societad purtadra dal parc cun in label per products, sch’il producent ademplescha tschertas pretensiuns.

Il label per parcs

Sch’in parc ademplescha las pretensiuns da la Confederaziun vegn el certifitgà cun il label protegì «Parc d’impurtanza naziunala». Il label vala per 10 onns, suenter ston las societads purtadras puspè dumandar da nov il label. Il label garantescha ch’il parc ademplescha las pretensiuns necessarias puncto cuntrada, natira e cultura, che la gestiun dal parc è professiunala e che l’existenza dal parc è garantida democraticamain, finanzialmain e spazialmain a lunga vista. Durant la fasa da creaziun e d’installaziun pon ils parcs futurs pretender il label provisoric da candidatura.

Il label per products

Products e servetschs dals parcs pon vegnir certifitgads da las societads purtadras dals parcs cun in label per products dals parcs svizzers. 10 parcs han ensemen gia passa 40 sortiments cun tschientinas da victualias – e quellas creschan di per di. Dal Parc natiral da Thal (SO) datti per exempel la «Jura-Kette» (ina liongia). Er il chaschiel d’alp «Etivaz» dal Parc natiral Gruyère Paysd’Enhaut, il «Mostbröckli» dal Parc natiral dal Giura argovian ed il risot da granezza dal Parc natiral da Gantrisch portan il label per products «Parcs svizzers» – ina garanzia per spezialitads regiunalas d’auta qualitad che vegnan producidas en in dals parcs. Per che products e servetschs possian retschaiver il label, ston ils products ademplir las pretensiuns da la marca regiunala ed ils servetschs vegnir purschids principalmain entaifer il territori dal parc. Ultra da quai duain els esser producids en maniera duraivla e rinforzar l’economia regiunala. Ina procedura da certificaziun definida da la Confederaziun garantescha che questas pretensiuns vegnian ademplidas. Ils consuments contribueschan cumprond quests products e quests servetschs al mantegniment ed a la valurisaziun da la biodiversitad e da la cuntrada, al svilup da valurs culturalas specificas ed ad ina economia regiunala vitala.